Estudantes da Cachada tiveron a oportunidade, na tarde do martes, de aproximarse un pouco máis á cultura de Marrocos e Senegal. Isto foi posible grazas a un programa que desde o pasado ano impulsa a oenegué Contacto e no que a dirección do instituto boirense quixo implicar a algúns dos seus alumnos.

Desta forma, cidadáns de ambos os países africanos explicaron aspectos característicos dos seus lugares de procedencia e ofreceron datos relativos á súa economía e as principais actividades.

O encontro concluíu cunha cerimonia do té ofrecida polos invitados marroquís. A presidenta de Contacto, Joanna Beltrán, sinalou: «Tratamos de dar a coñecer a realidade doutras partes do mundo. Os mozos son un público moi receptivo». A oenegué xa ten en marcha novas iniciativas de integración similares.