O debate do anteproxecto da Lei de convivencia e participación da comunidade educativa que prepara a Xunta mesturouse co caso do veo de Arteixo, con constantes cruces de declaracións entre as tres forzas políticas do Parlamento galego. Así, o deputado socialista Guillermo Meijón acusou ao conselleiro de «non atreverse a mediar no conflito», mentres que Vázquez replicou que o PSOE fai caso aos consellos escolares «cando convén».

O anteproxecto que prepara a Xunta abre, no seu artigo 10, a posibilidade de regular a vestimenta nas aulas. «As normas de convivencia poderán conter previsións sobre atuendos ou vestimenta dos alumnos, orientadas a garantir que o mesmo non atente contra a súa dignidade nin supoña un risco para a súa saúde ou integridade persoal e a dos demais membros da comunidade educativa, ou impida ou dificulte a normal participación do alumno nas actividades docentes».