Merkel busca traballadores españois

Nas décadas dos cincuenta e dos sesenta, miles de españois, moitos deles galegos, decidiron facer as maletas e pór rumbo a Centroeuropa para conseguir o posto de traballo que aquí lles faltaba. A maioría acababan contratados en empregos de manufactura na industria. Eran outros tempos, agora a situación é moi diferente. Medio século despois, Alemaña busca novos españois cualificados e en situación de desemprego para resolver, en certo xeito, a súa carencia deste tipo de profesionais.

A chanceler alemá, Angela Merkel, exporá esta posibilidade ao presidente do Goberno, José Luis Rodríguez Zapatero , no cume bilateral que manterán o próximo 3 de febreiro en Madrid. Segundo informa o semanario Der Spiegel, este proxecto de cooperación bilateral atópase entre os principais temas da axenda de ambos os países.

A Unión Democristiá (CDU), o partido de Merkel, responde ás queixas dos líderes sindicais xermanos sobre a escaseza de persoal cualificado nas empresas. Ademais, España poderá reducir a súa taxa de paro xuvenil, que xa alcanza o 43% e que foi catalogada polo presidente da Comisión Europea, José Manuel Durão Barroso, de «escandalosa».

«No sur e o leste de Europa hai moitos mozos desempregados que buscan un traballo», explicou o viceportavoz da CDU no Reichstag, Michael Fuchs. Por esa razón, esta proposta estenderase a outros estados azoutados pola crise do desemprego e da débeda.

España e Portugal son os países predilectos, xa que contan cunha alta taxa de paro deste tipo de traballadores e porque os trámites burocráticos de emigración son moito máis simples xa que están dentro da Unión Europea e hai libre circulación de persoas. Para o máximo responsable da CDU en Baviera, Max Straubinger, é mellor conseguir forza laboral que proveña da Comunidade, «que ter que cambiar as leis de inmigración».