(24/01/2011)
España lidera a detención de sen papeis na UE
A policía apresou a 12.122 estranxeiros en situación irregular no terceiro trimestre de 2010
DANIEL AYLLÓN MADRID 22/01/2011 08:00 Actualizado: 22/01/2011 14:34
A pesar de que o número de detencións de sen papeis residentes en España caeu un 21% no terceiro trimestre de 2010, o país seguiu sendo o que máis inmigrantes apresou, cun total de 12.122, dentro do conxunto de países membros da Unión Europea (UE) e o espazo Schengen. O balance forma parte do informe xullo-setembro de Frontex, a Axencia Europea para a Xestión da Cooperación Operativa nas Fronteiras Exteriores dos Estados Membros da UE.
As dificultades para lograr a expulsión dos detidos varía en función da súa procedencia. España ten asinados acordos bilaterais de repatriación con varias decenas de países, pero o gran abanico de nacionalidades dos detidos (122, no terceiro trimestre) dificultou a súa expulsión.
O 12% dos detectados en España eran marroquís
O maior colectivo de detidos foi o marroquí. O 12% de total de apresados en España procedían do reino alauita. Ademais de ser o colectivo extracomunitario máis numeroso en España (o 1 de xaneiro de 2010 había 746.760 empadroados), unha circular interna da Policía filtrada aos medios de comunicación en 2009, instaba aos axentes a deter, preferiblemente, a marroquís porque resulta máis fácil a súa expulsión de España. No entanto, o Ministerio do Interior deu orde de retirar esa directriz, tras a súa publicación en prensa.
Novos colectivos
Tras Marrocos, os colectivos con máis sen papeis detidos foron os bolivianos, paraguaios e brasileiros. Estes grupos son os de chegada máis recente a España e, xa que logo, os que non puideron regularizar a súa situación por arraigamento de forma xeneralizada. A nivel continental, o país que acumulou máis detencións de sen papeis foi Afganistán, cun total de 5.221 (un ano antes foron 10.472), por diante de Marrocos (4.913), Albania (4.557), Serbia (4.231) e Alxeria (3.439).
A fronteira grega con Turquía é a principal porta de entrada á UE
No informe do cuarto trimestre de 2010 aínda en preparación a detención de irregulares alxerinos disparouse ata o segundo posto, por detrás dos afgáns, segundo o director adxunto de Frontex, Gil Arias.
A fronteira quente de Grecia
Para o coordinador da vixilancia de fronteiras, o problema máis grave está no límite de Grecia con Turquía, polo deixamento ou falta de recursos de ambos os estados. "A un alxerino, resúltalle máis barato e máis seguro voar a Istambul, e pasar desde alí por terra a Grecia, que intentalo polo mar", critica Arias. Ademais de Grecia, os Balcáns son a área que máis preocupa ao Frontex. Nos próximos meses espérase un aumento da presión migratoria en países como Bulgaria ou Romanía.
A permeabilidade da fronteira grega fixo que o terceiro trimestre de 2010 rexistrase o número máis alto de detencións de sen papeis nas fronteiras exteriores da UE, segundo o informe de Frontex. Ademais da clasificación por nacionalidades, a axencia europea de fronteiras alertou sobre o aumento da proporción de menores non acompañados nalgunhas das rutas migratorias.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas