Unha oportunidade é o título dunha curtametraxe, escrito e dirixido por Gabriel Tizón, que nos mete de cheo na vida dos inmigrantes que deixan atrás os seus fogares e as súas familias para intentar mellorar as súas vidas. O protagonista desta historia real é Mathurin Diagne, un vendedor ambulante senegalés que se enfronta a diario ao rexeitamento do estilo de vida occidental, sen que ese desprezo o desanime. Mathu entende o compromiso cultural como a mellor arma para a integración e a tolerancia. Este curto, no que tamén ten un pequeno papel o artista pontevedrés, Antón Sobral, serviu onte para ilustrar unha mesa redonda sobre Inmigración en tempos de crises, organizada polo Ateneo e celebrada no Café Moderno. Entre os relatores estaban Abdul Fatta Seye, Demba Yali Diop e Timthee Badji, representantes da Asociación Senegalesa Dioco.