Ferrol ensina galego aos inmigrantes para favorecer a súa integración

O Concello de Ferrol dará clases gratuítas de lingua galega ao colectivo inmigrante da cidade, tamén dirixidas a emigrantes retornados, para favorecer a súa integración sociolaboral no municipio, segundo indicaron fontes do departamento de Benestar Social.

A edil da área, María López, explicou que se trata dun curso básico de 20 horas lectivas, pensado para eliminar «barreiras lingüísticas» á hora de acceder a un emprego.

O curso, que comeza hoxe, estará coordinado pola Oficina Municipal de Inmigración.

A oficina municipal de inmigración de Ferrol ocúpase de asesorar e orientar ao colectivo inmigrante da cidade sobre os seus dereitos e deberes, ademais de pór en práctica programas específicos e axudarlles a tramitar documentación para regularizar ou estabilizar a súa situación na comunidade.