As primeiras escenas de «Anos despois» foron proxectadas no Festival de Cine Internacional de Ourense.
A directora mexicana Laura Gárdos acaba de presentar o avance dunha película que trata do retorno dun fillo de emigrantes a Galicia en busca do seu avó. Anos despois é unha coprodución entre México e Galicia que se rodou a comezos de ano en México, Ourense, Cartelle e Celanova. A estrea está programada para o primeiro semestre do 2011.
Un tráiler coas primeiras imaxes da fita foi presentado no Festival de Cine Internacional de Ourense celebrado en principios deste mes. A produción conta coa participación de actores como Angélica María, Celso Bugallo, Ernesto Chao ou María Bouzas.
A historia trata dun fillo de emigrantes galegos en México que retorna ás súas orixes ao decatarse de que o seu avó, a quen daba por morto hai anos, segue vivo en Galicia.
Segundo o coprodutor de Anos despois, Antón Reixa, o proxecto abre camiño para novos traballos en conxunto co país latinoamericano por tratarse da primeira película realizada coa colaboración México-Galicia. «Este proxecto é unha suma de talentos que vai dar como resultado unha gran película», afirmou Reixa.