O Concello de Betanzos a través do Servizo de Normalización Lingüística organiza un Obradoiro de integración cultural e lingüística para inmigrantes. Este obradoiro está destinado ao alumnado estranxeiro dos centros de ensino de Betanzos e á poboación inmigrante en xeral e terá lugar na Aula da OMIX (Oficina Municipal de Información Xuvenil, sita no complexo cultural Santo Domingo) os días 21, 22, 25, 26, 27 e 28 de outubro en horario de 17:00 h a 19:00 h.
A sociedade galega conta cunhas características particulares como son a súa historia, cultura e lingua propias que a diferencian doutras comunidades autónomas. Un dos primeiros pasos para integrarse na comunidade a que se achegan as persoas estranxeiras, e nomeadamente as familias é achegarse á cultura e á lingua do lugar que os acolle, por iso, dende o Concello de Betanzos e a través do Servizo de Normalización Lingüística organizamos este Obradoiro de integración cultural e lingüística.
Traballaranse contidos relacionados tanto coa lingua como coa cultura galega e betanceira. Trataranse polo miúdo as nocións para a comprensión da lingua galega estimulando a participación do alumnado, igualmente abordaranse contidos relacionados coa historia, xeografía, poboación, a xente, os costumes e os escritores de Galicia. Farase referencia ao cinema, o teatro e a actual literatura galegas, así como outros ámbitos cruciais para desenvolvérense na súa vida común como as novas tecnoloxías, o mundo laboral ou o lecer cotián.
As solicitudes de inscrición poderanse recoller e presentar no Servizo de Normalización Lingüística do Concello de Betanzos, no 2º andar da Casa do Concello, na praza da Constitución, dende o día 7 ata o día 19 de outubro.
