Cando A Coruña está en África

Desde hai once anos, Ecodesarrollo Gaia funciona na cidade, sendo os emigrantes senegaleses a maior parte dos beneficiarios das súas actividades. Guillermo Fernández Obanza argumenta que desde a ONG «tratamos de mitigar o impacto que para eles supón chegar a un lugar descoñecido, de establecer sinerxías positivas entre a poboación e os seus novos veciños». Destaca que no fondo «trátase de facer realidade aquilo de que nesta cidade ninguén é forasteiro» e sostén que entre a poboación «apenas atopamos casos de negatividad cara a estes emigrantes». Cursos de español, asesoramento laboral e administrativo ou distribución de comida son algunhas das actividades que leva a cabo Ecodesarrollo Gaia, a maioría baixo o lema Coruña Aberta.

A atención ás mulleres emigrantes e o fortalecemento das estruturas familiares son outras tarefas nas que se afanan as tres persoas que traballan na entidade: María Barba , Cristina Dieguez e Jesús Silvela.

Aínda que a sede está nun baixo da Sacra Familia, Ecodesarrollo Gaia realiza actividades, en colaboración con centros cívicos e con diversas entidades da cidade. Segundo a última memoria anual publicada pola ONG, a súa asesoría xurídica atendeu case un milleiro de casos, mentres que a asesoría laboral tramitou 546 expedientes socio-sanitarios e atenderon a 565 persoas; ademais, case cen usuarios achegáronse ás novas tecnoloxías, 115 asistiron ás clases de español e nas actividades destinadas á infancia e a mocidade participaron máis de setecentos mozos, indican desde Ecodesarrollo Gaia.