(16/06/2010)
A nova fase do programa promocional centrarase nas próximas semanas en avión e en Beariz
As quince construtoras e inmobiliarias locais que participan, desde decembro de 2009, na campaña Vive O Carballiño, Vive non Carballiño promocionando a vila como cidade dormitorio de Ourense están moi satisfeitas dos resultados obtidos ao haberse vendido ata o momento xa 70 pisos, segundo recoñeceu o edil de Turismo, Manuel Dacal.
A iniciativa, da Agrupación de Promotores e Construtores co apoio do Concello e da asociación local de comerciantes, está a espertar ademais un gran interese entre a poboación, segundo despréndese tamén das visitas que reciben as páxinas nos que se inclúe esta promoción, www.segundamano.es e www.elidealista.com, que superan os dous milleiros de entradas.
A nova campaña publicitaria, explica Dacal Fernández, iniciará nas próximas semanas unha nova fase que se concretará en «tocar moito a zona de Avión e de Beariz», onde xa están a empezar a chegar os emigrantes galegos a gozar das súas vacacións.
Incidirase en todos os residentes no exterior que queren regresar a Galicia nun futuro próximo, xa que con esta campaña, precisa o edil socialista, «poderán adquirir unha vivenda a bo prezo, e sobre todo con grandes facilidades».
O material publicitario que se pode ver ademais este mes nos exemplares da revista inmobiliaria «A miña casa en Ourense» incide no alto nivel de comunicacións que ofrece O Carballiño co resto de cidades galegas e co norte de Portugal.
A iso súmase unha ampla oferta de vivendas, a prezos competitivos, con pisos de dúas habitacións desde 69.000 euros ou 250 euros ao mes, ao ser a poboación xuvenil unha das principais destinatarias da campaña inmobiliaria.
Información inmobiliaria e condicións de pago que se fará chegar tamén aos distintos centros galegos no exterior e ás asociacións de emigrantes como potenciais compradores.
Incentivos
A estratexia inmobiliaria de venda inclúe ademais importantes incentivos xa que a todos os compradores de pisos no Carballiño dentro desta campaña regálaselle un televisor de corenta e dúas polgadas. Entre todos os novos compradores sortearase ademais a finais do presente ano o importe da súa hipoteca durante un ano cun importe máximo de 6.000 euros.
O éxito da proposta de venda facilitou ademais que a asociación de construtores e promotores do Carballiño renovase este ano a campaña con MKTV, a axencia especializada en asesoría publicitaria que a puxo en marcha a finais de 2009.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas