(01/06/2010)
A emigración laboral crece un 7% en Galicia, que se converte na comunidade con máis traballadores no estranxeiro
O número de persoas que saíron de Galicia para buscar traballo no estranxeiro creceu un 7 por cento nos dous últimos anos fronte ao 9,2 por cento de media española, o que sitúa á galega como a cuarta comunidade estatal con menor fuga de traballadores nos últimos anos. Con todo, Galicia, con máis de 352.000 traballadores no estranxeiro, é a rexión española cun maior número de emigrantes.
EUROPA PRESS. 01.06.2010
Así o evidencia un estudo sobre Mobilidade Internacional realizado polo Grupo Adecco, no que se reflicte que o motivo máis común da saída de traballadores galegos ao estranxeiro foi a situación do mercado español e o incremento do paro. Ademais, en só dous anos incrementouse nun 50 por cento o número de traballadores que afirma que deixaría España por un soldo igual ou ata menor que o que recibe.
As cifras demográficas oficiais sitúan a Galicia como a cuarta Comunidade con menor fuga de traballadores ao estranxeiro desde o inicio da crise, cun incremento do 7 por cento que representa un total de 23.000 galegos maiores de idade.
Por provincias, Ourense é a que experimentou un maior incremento no seu número de residentes no estranxeiro, do 9,8 por cento. Tras ela, Lugo e A Coruña viron incrementar o seu numero de emigrantes nun 7,8 por cento e 6,4 por cento, respectivamente. Á cola sitúase Pontevedra, que creceu un 5,9 por cento neste parámetro.
Home novo e altamente cualificado
En liñas xerais, segundo o Departamento de Mobilidade Internacional do Grupo Adecco, as persoas que senten máis atraídas pola idea de traballar no estranxeiro son fundamentalmente homes, cuxas prioridades laborais son a responsabilidade do seu posto, a autonomía profesional e a perspectiva de facer carreira na compañía en cuestión.
Estas motivacións difiren se falamos da poboación feminina. Polo xeral, elas buscan un bo ambiente laboral e flexibilidade de horarios.
Tanto homes como mulleres coinciden en que se trata dunha oportunidade idónea de aprender un idioma ou vivir unha experiencia diferente noutro país e entre os maiores demandantes están os enxeñeiros, arquitectos e informáticos, que perderon o seu emprego ou consideran que o seu traballo será máis valorado fóra de España.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas