Protesta en Bos Aires polos recortes do voto

Protesta en Bos Aires polos recortes do voto
Máis de medio milleiro de españois protestan en Bos Aires polos recortes do voto.
Baixo o lema "Non queremos ser cidadáns de segunda", máis de medio milleiro de españois e descendentes marcharon o sábado pasado, día 15, en Bos Aires ata a sede da Cancillería española para entregarlle ao ministro conselleiro da Embaixada unha carta dirixida ao presidente do Goberno de España, José Luís Rodríguez Zapatero. A primeira marcha en repudio aos recortes no voto da cidadanía residente no exterior partiu, ao son de gaitas e pandereitas, do monumento dos españois ata a Cancillería.


A marcha estaba convocada polo Consello de Residentes Españois (CRE) de Bos Aires, a Federación de Sociedades Españolas, a Federación de Asociacións Galegas e a Federación Unión de Asociacións Galegas.

Simultaneamente, realizáronse manifestacións en Brasil, Paraguai, Suíza e Chile, nalgúns casos convocadas polos CRE, noutros, por federacións locais.

En Bos Aires, en principio, explicou a presidenta do CRE-Bos Aires, María Teresa Michelón, reuníronse "as catro cabezas" (o CRE de Bos Aires, a Federación de Sociedades Españolas e as federacións galegas) porque querían manterse "á marxe dos partidos políticos". Ademais, a conselleira informou que á marcha tamén se adheriron os CRE de Mendoza e Córdoba, que encabezan Felipe Andreu e Justino Navas, respectivamente.

Aínda que nesta ocasión, segundo manifestou Michelón, as protestas realizáronse "por separado", a intención é continuar en contacto para coordinar accións máis unificadas. "Intentaremos facer unha próxima reunión con maior cantidade de xente representativa da colectividade española en Arxentina", dixo e subliñou, que "isto non é contra ninguén, nin políticos, nin persoas, é un pedido de reflexión porque nós queremos seguir sendo españois de feito e de dereito".

Pola súa banda, o presidente da Federación de Sociedades Españolas de Arxentina sinalou, durante a marcha que se concentrou fronte ao monumento dos españois, que non só repudiaban o principio de acordo entre os partidos maioritarios para recortar os dereitos políticos dos emigrantes; "tamén repudiamos -dixo- aos partidos políticos que impulsan este acordo e, especialmente, ás súas delegacións no exterior porque non fixeron nada para defender a nosa situación".

Arturo Pérez, en representación de máis dos máis 120 centros federados, foi un dos asinantes da misiva que se fará chegar a Zapatero.

Outro dos asinantes do documento foi o presidente da Federación Unión de Asociacións Galegas, Adonis Pampín Cagide, quen reiterou que se trata só do comezo das accións de protesta. "Queremos que se revea esta medida e seguiremos loitando ata conseguilo", aseverou.

Outro dos asinantes, o presidente da Federación de Asociacións Galegas da República Arxentina, Francisco Lores, lamentou que o PP e PSOE soamente sexan capaces de unirse para recortar o voto dos cidadáns residentes no exterior e advertiu que o recorte nos dereitos políticos da emigración, será un máis dos recortes que o presidente do goberno pensa aplicar en España e agregou: "Os españois non mandamos máis en España, agora mandan as multinacionais do mercado común europeo".

Lores defendeu especialmente a posibilidade de votar nos comicios municipais. "O voto nas municipais -dixo- é o que máis nos chega ao corazón, é o voto patriótico, é o voto económico, o voto de relacións, o voto do noso pobo".

Finalmente, o dirixente mostrouse moi satisfeito "pola unidade que se está conseguindo" e remarcou que a marcha do 15 de maio foi o comezo"; "imos seguir en contacto e facendo cousas", asegurou e adiantou que a próxima concentración podería realizarse nas portas do Consulado de España.

Nesta liña, o secretario de Federación de Asociacións Galegas, Luís Fernández, expresou: "cremos que se primeiro recórtannos os dereitos políticos, logo, seguramente, virán os recortes sociais e de toda índole".

Nas portas da Cancillería, tras o encontro que mantiveron os representantes das tres Federacións e o Consello de Residentes Españois de Bos Aires, o conselleiro ministro da Embaixada española, Rodrigo de Cárcer, asegurou que lle parecía "un texto impecable".

Rodrigo de Cárcer agradeceu, así mesmo, aos presentes a súa vontade de participación e sinalou que a manifestación representaba "un acto de democracia". "Sempre é mellor expresar as opinións democraticamente que quedar na casa lamentándose", continuou. O ministro conselleiro recibiu a misiva, en nome do embaixador, Rafael Estrela, e afirmou que lla faría chegar non só ao presidente do goberno "a quen ía dirixida" senón que, ademais, coa autorización dos asinantes, entregarase ao Rei e ao Parlamento español, "que é onde realmente se toman estas decisións", dixo.

Mariana Ruiz, Bos Aires.
Fonte: Crónicas da emigración.