(04/05/2010)
O Campus ofrece 12 bolsas a emigrantes retornados
A iniciativa da Deputación e a Universidade de Vigo custará 37.000 euros
Imanol Hernández - OURENSE - 04-05-2010
Co obxectivo de facilitar a mobilidade de estudantes descendentes de emigrantes ourensáns, galegos ou españois e tamén de persoas de nacionalidade estranxeira para que poidan cursar estudos de grao e posgrao no campus de Ourense, o reitor da Universidade de Vigo, Alberto Gago, e o presidente da Deputación provincial, José Luís Baltar, asinaron onte un convenio de colaboración para a posta en marcha dun programa de bolsas.
A iniciativa insérese dentro do interese común que teñen ambas institucións de promover a vinculación das persoas descendentes de emigrantes coa súa terra de orixe e de fomentar a proxección internacional da oferta educativa do campus .
O acordo permitirá outorgar doce bolsas que cubrirán o custo da matrícula no centro que corresponda, unha praza de aloxamento na residencia universitaria e unha axuda de 600 euros para contribuír aos gastos da viaxe. A Deputación colabora cunha achega de 25.000 euros e o Consello Social da Universidade de Vigo, que preside Emilio Atrio, tamén presente no acto, con outra de 12.000 euros, mentres que a Dirección Xeral de Universidades e a de Emigración encargaranse dos gastos de papelería, distribución e promoción da iniciativa.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas