(15/04/2010)
O Foro Galego de Inmigración, que agrupa a 80 asociacións e entidades de toda Galicia, fixo un balance crítico da política de inmigración da Xunta de Galicia. Miguel Fernández, portavoz, dixo que «tras varios intentos» o secretario xeral de Emigración non recibe ao colectivo, a pesar de ser o grupo máis representativo deste colectivo en Galicia.
Denuncian que a Xunta abandonou o Plan Autonómico de Inmigración, que «xa desenvolvera pouco ou goberno anterior» e indicou que, na actual situación, «case desapareceu».
Tampouco se mostraron satisfeitos co programa de mediación intercultural, xa que tan só conta cunha persoa dunha asistencia técnica, que traballa na mesma secretaría. Acusan á Xunta de modificar o funcionamento do Consello Galego de Inmigración, excluíndo das comisións de traballo ás persoas que manifestaron as críticas.
Doutra banda, a decisión da Xunta de modificar o sistema para impartir cursos de formación para inmigrantes está a carrexar unha infinidade de problemas. Retiráronse as subvencións que recibían as asociacións para este fin e, a cambio, a Xunta propón os cursos que ofrecen empresas privadas. Aseguraron que a oferta non responde ás necesidades do colectivo e que as academias que ofrecen os cursos non teñen contacto cos inmigrantes, polo que teñen dificultades para facer chegar a oferta.
Fondo de apoio
Pola súa banda, o PP esixe ao Goberno que manteña o Fondo de apoio para a integración de inmigrantes. María Jesús Sainz denunciou que se reduciu nun 65% e que Galicia recibirá 2 millóns de euros.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas