(25/03/2010)
Galicia Emigración convoca o concurso infantil 'O camiño da migración'
Lri - Santiago - 25-03-2010
A Fundación Galicia Emigración- en colaboración coa Consellería de Cultura e Turismo e a Consellería de Educación e Ordenación Universitaria- convoca o concurso de debuxo O Camiño da migración orientado a alumnos de quinto e sexto de Primaria.
Un momento do espectáculo Santimbanco, do Circo do Sol.
O fin último é fomentar a interculturalidade e o respecto a diferenza, sen discriminación algunha, a través dunha manifestación artística como é a pintura. Así, recollerase a propia visión dos alumnos participantes sobre a convivencia entre persoas de diferentes países, razas e culturas como forma de enriquecernos, vinculado á idea de persoas 'en Camiño'.
A través deste concurso búscase relacionar ao Camiño de Santiago cos movementos migratorios, tendo en conta que o camiño de Santiago foi o comezo da integración do territorio peninsular en Europa.
Bases
Todos os debuxos serán orixinais e poderán realizarse con calquera material e técnica. Ademais no debuxo hai posibilidade de incluír o texto que se considere alusivo á temática do concurso. As creacións serán inéditas, e non poden obter premios ou accésits noutros certames.
A recepción dos debuxos farase na sede da Fundación Galicia Emigración- Rúa do Vilar, nº. 15. Santiago-, ata o próximo 13 de abril.
Os debuxos serán premiados de acordo coas seguintes categorías; catro primeiros premios: consistentes cada un deles nunha bicicleta; catro segundos premios: consistentes cada un deles en dúas entradas para o espectáculo 'Saltimbanco' do Circo do Sol- que terá lugar en Santiago de Compostela do 21 ao 25 de abril de 2010- e catro terceiros premios: consistentes cada un deles nun lote de libros e material escolar. Así mesmo, os colexios ou centros dos alumnos premiados recibirán un diploma de recoñecemento.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas