(16/03/2010)
Máis recursos para os municipios con máis inmigrantes suxire Corbacho
Vanessa Macher
"Un municipio con porcentaxe moi elevada de inmigración tería que ser obxecto de "discriminación positiva" desde o punto de vista económico" asegurou este luns o ministro de Traballo e Inmigración de España, Celestino Corbacho, durante unha entrevista en Catalunya Radio, tras argumentar que o aumento de recursos nos concellos evitaría posibles conflitos entre os autóctonos e os recentemente chegados residentes.
"Nestes momentos, o feito de que os concellos teñan recursos limitados fai que sexan os primeiros en sufrir as consecuencias do incremento da inmigración", resaltou Corbacho.
O titular de Traballo e Inmigración, precisou que os concellos onde se concentran unha porcentaxe maior ao 10 por cento de poboación estranxeira residente, contan cunha presión económica superior, que afecta directamente aos servizos públicos.
"Cando se acaban as bolsas de comedor nunha escola, este problema non se pode atribuír a 'o último en chegar', senón que hai que poñer máis medios para atender a situación dun centro que ten unha singularidade especial", engadiu o ministro.
Corbacho resaltou ademais que para saír da crise económica, España ten que gañar competitividade, o cal non pasa pola redución de salarios, senón a través de investimento en formación, tecnoloxías e innovación.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas