As dúas mil caras da inmigración

Nos 16 municipios de Bergantiños, Soneira e Fisterra, ademais de Cerceda, viven unhas 2.000 persoas procedentes doutros países, máis de 40, segundo os datos do 2008. Os do 2009 están a piques de darse a coñecer e é posible que a cifra se incremente, vista a evolución do último lustro. Só entre o 2007 e o 20008 o crecemento foi de máis de 400 persoas. No 2001, apenas había 600 estranxeiros empadroados. Un matiz importante, porque son moitos os que non o están, así que calquera cifra oficial será inferior á real.

O perfil dos foráneos que elixen a Costa da Morte para vivir é moi diverso. Desde persoal moi cualificado, como profesores de idiomas nos institutos, médicos do hospital de Cee, dentistas, oftalmólogos, arquitectos, pintores, empresarios e xubilados con posibles, ata mozos que chegaron a España en pateras desde África e chegaron á comarca en busca dunha vida mellor. Un mapamundi persoal que nada ten que ver co deserto cosmopolita de hai moi poucos anos.

Algúns concellos dedican especiais esforzos á súa integración e acollemento. Un deles foi Vimianzo, con cursos para facilitar a súa adaptación, impartidos polos servizos sociais. Vimianzo, A Laracha e Carballo teñen as cifras máis altas.